លួចម៉ូតូគេ១គ្រឿងទៅលក់នៅភ្នំពេញ មកវិញសមត្ថកិច្ចចាប់ខ្លួន
20-July-2016 | ដោយ មែន កំសត់
ខេត្តកំពង់ឆ្នាំង ៖ ជនសង្ស័យចំនួន៣នាក់ ត្រូវបានសមត្ថកិច្ចនគរបាលស្រុកទឹកផុសធ្វើការចាប់ឃាត់ខ្លួនជា បន្តបន្ទាប់ នៅរសៀលថ្ងៃទី១៩ ខែកក្កដា ឆ្នាំ២០១៦ នៅទីកន្លែងផ្សេងៗគ្នា ឃុំក្តុល និងឃុំអភិវឌ្ឍន៍ស្រុកទឹកផុស ដោយចោទប្រកាន់ពីបទលួច មានស្ថានទម្ងន់ទោស ដែលបានប្រព្រឹត្តឡើង កាលពីរំលង អាធ្រាត្រឈានចូលថ្ងៃទី២៧ ខែមិថុនា ឆ្នាំ២០១៦។
លោក ខែម វិបុល អធិការនគរបាល ស្រុកទឹកផុសបានឲ្យដឹងថា កាលពីរំលងអាធ្រាត្រ ឈានចូលថ្ងៃទី២៧ ខែមិថុនា ឆ្នាំ២០១៦ មានជនសង្ស័យមួយក្រុម បានធ្វើសកម្មភាពលួចម៉ូតូម៉ាកហុងដាសេ១២៥ ស៊េរី០៨ មួយគ្រឿង ជារបស់ឈ្មោះ អ៊ុន គឹមសាន្ត ភេទប្រុស អាយុ៥៣ឆ្នាំ មានទីលំនៅភូមិស្រែតាជ័យ ឃុំអភិវឌ្ឍន៍ ស្រុកទឹកផុស។ លោកបានបន្តថា ក្រោយការស្រាវជ្រាវយ៉ាងយកចិត្តទុកដាក់ និងសាក្សីដាក់បន្ទុកផងនោះនៅថ្ងៃទី១៩ ខែកក្កដានេះ សមត្ថកិច្ចនគរបាលរបស់លោក បានសម្រេចឃាត់ខ្លួនជនសង្ស័យចំនួន៣នាក់ ដែលបានធ្វើសកម្មភាព លួចម៉ូតូជូនរងគ្រោះ កាលពីជិតមួយខែមុន។ ជនសង្ស័យទាំង៣នាក់មាន ១.ឈ្មោះ នូ ម៉ានីន អាយុ១៨ឆ្នាំ ២.ឈ្មោះ ទេព ចន្នី អាយុ១៨ឆ្នាំ និង៣.ឈ្មោះ លី ម៉ាប់ អាយុ២២ឆ្នាំ ទាំង៣នាក់មានទីលំនៅ ភូមិស្រែតាជ័យ ជាមួយម្ចាស់ម៉ូតូរងគ្រោះដែរ។
នៅចំពោះមុខសមត្ថកិច្ច ជនសង្ស័យទាំង៣នាក់បានសារភាពថា ពួកគេពិតជាបានលួចម៉ូតូជនរងគ្រោះពិតមែន ដោយយប់នោះ ២នាក់បានធ្វើសកម្មភាពចូលលួច និងម្នាក់ទៀត នៅចាំខាងក្រៅហើយបន្ទាប់ពីលួចបាន ពួកគេបានជិះម៉ូតូនោះ សំដៅទៅភ្នំពេញលក់បានចំនួន២៥០ដុល្លា ហើយបន្តនៅដើរលេងស៊ីចាយអស់ ទើបត្រឡប់វិញបានប៉ុន្មានថ្ងៃ ត្រូវសមត្ថកិច្ចចាប់ខ្លួនតែម្តង។ ជនសង្ស័យទាំង៣នាក់ ត្រូវបានសមត្ថកិច្ចនគរបាល ស្រុកទឹកផុស កសាងសំណុំរឿងបញ្ជូនមកស្នងការដ្ឋាន នគរបាលខេត្ត ដើម្បីបន្តតាមនិតិវីធី បញ្ជូនទៅតុលាការចាត់ការតាមផ្លូវច្បាប់៕
ចំនួនអ្នកទស្សនា
- ថ្ងៃនេះ1221
- ម្សិលមិញ6261
- សប្តាហ៍នេះ19601
- ខែនេះ134751
- ឆ្នាំនេះ134751
- សរុប20577207